الشاعر انطوان عكاري يقدم احتفال جائزة شربل بعيني في الأونيسكو

القصيدة الإفتتاحيّة
ـ1ـ
حاسس كأنّي اليوم بجنينه
وأطيب فواكه طالعه بعيني
وحابب شي مرّة توّج الإيّام
وتظبط معي وتتحقّق الأحلام
بشي جايزه من شربل بعيني..
ـ2ـ
للأبجديّة هون في معهد
عن مجد حرف جبيل ما بيبعد
وللشعر عنّا وللتراث محلّ
وطلّة بهيّة وقت ما بتطلّ
بيتلوّن الورد وبيفوح الفلّ
بنورا البيدوّب تلج المجمّد
ـ3ـ
معقول عم إحكي أنا... وليليان
قبالي؟ قولولي بسّ شو بقلاّ
وبطلّتا أيلول صار نيسان
وقصر الأونيسكو كتير متحلاّ
وشوقي السجلّو بالفخر مليان
وبعالم الإبداع ما خلاّ
لا درع لا وِسام لا نيشان
إلاّ وعا صدرو حبّ يتدلا
وأنطون يا سعادة زجل لبنان
برج الشعر عا إيدك تعلا
يا مجمّع بدير الوحي رهبان
عبدو الكلمه من بعد اللّه
والياس يا لْ إسمك نبي خلقان
فوق الغمام بنار متجلاّ
سيفك الكلمة وعرشك القصدان
والمملكة بحضن السما محلاّ
وروبير إنت اخترت عن إيمان
تحمل عواميد الشعر كلاّ
تا رفعت لمجد الزجل بنيان
برفقة نقيب الكلّ عمرو كان
بقصايدو عيون الدنّي متلاّ
وتا يضلّ يبني بحكمة سليمان
بيكلّ منبر حطّ خشبة أرز
تا صار بالدنيي زجل لبنان
هيكلّ اللّي بقلبو الوحي صلا
**
تقديم الياس خليل
من البحتري وقيس وأبي تمّام
من الأخطل وبو الطيّب وعنتر
وكعب وزهير وعمر والخيّام
صيّغ زجل لبنان بالجوهر
شاعر إذا بينظم بيدقّو جراس
وبيرقّصو نجوم السما وعالرّاس
بيمسك على الدبكه أبو النوّاس
وبيكسر الريشه وبيكب الكاس
وبيقلّهن روحو جيبولي الياس
طالع عا بالي إسمع وإسكر.
**
تقديم جورج أبو أنطون
من حدّ روكز من حما الشحرور
مخاوى خليل ومخلص لأسعد
مربّا متل موسى بوكرو نسور
ولبطرس وإدوار شو تودّد
مقاسم طليع النهر والعصفور
ومع زين شعرو خالد مخلّد
وحنّا وأنيس وجريس المشهور
هوّي ورعد والسيّد وأحمد
هيدا النقيب لْ بالتعب مجبور
الزغلول شلّو بالقلب مقعد
عمرو لمجد شعر الزجل مندور
وبجران القلاعي الحكي عمّد
فضلو على الشعار عن بيدور
وعا قصايدو المنابر بتشهد
**
شوقي دلاّل
شوقي دلال قريت عنّو كتير
ولم جيت تا إحصي اللّي مكتوب
عدّيت كم في جايزة تقدير
ودرع ووسام وكم نخب مشروب
ضيّعت صابيعي عا كتر العدّ
لم شفت تاريخو غني هالقدّ
ومن حيث أرشيفو كتير كبير
صدّقوني لو قلت عن جدّ
بريو إيديّي... وسطّل الحاسوب
**
ليليان إندراوس
 لمّ بسمعا بحس الهوا بيرفّ
متل لْ مفرّخلو شي جنح ملاك
بلاقي الحكي متل العطر بيهفّ
والليل قايم يفتح الشبّاك
لا تجرّح الناي ولا تنقر دفّ
لا توجّع ربابه ولا تزقف كفّ
ليليان عالشاشه إذا بتطلّ
بتحسّ صوتا صار صوت الكلّ
لكلّ مشكله عندك في عندا حلّ
بتعرف بلا تسألك شو باك...
**
روبير خوري
مضيّع قصيده أو إسم ديوان؟
وشاعر بإسمو ما حدا بيسمع؟
بدّك حدا مأرشف زجل لبنان
ردّة وقصيده وخاتمه ومطلع؟
بدكّ لتاريخ الزجل عنوان؟
روبير خوري القصد والمرجع.
**
أنطوان سعاده
متل المحامي دارس قوانين
فنّ الزجل ومغيّب الأوزان
ومعتّق بروحو الخوابي سنين
بخمر الأصاله بجوهر القصدان
إسمو بياض التلج عا صنّين
وشعرو دخيره من زجل لبنان.
**